काठमाडौँ । निरन्तरको वर्षाका कारण आएका बाढीपहिरो र डुबानमा परी ठुलो जनधनको क्षति हुँदै गएपछि राजमोले पीडितहरूको उद्धार र सहयोगमा जुट्न सार्वजनिक अपिल गरेको छ । राजमो अध्यक्ष चित्र बहादुर केसीले २०७५ असार १९ गते एक प्रेस वक्तव्य जारी गर्दै यस सम्बन्धमा भन्नु भएको छ– “नेपालमा हालै आएको वर्षा, बाढी र पहिरोबाट पहाड र तराईमा समेत ठुलो जनधनको क्षतिप्रति राष्ट्रिय जनमोर्चाको गम्भीर ध्यान आकर्षित भएको छ । हाम्रो पार्टीले उक्त बाढीपहिरोबाट निधन भएका सबै व्यक्तिहरूप्रति श्रद्धाञ्जली प्रकट गर्दै उनीहरूका परिवार जनप्रति समवेदना प्रकट गर्दछ ।
वर्षा मौसम बढ्नुका साथै त्यस प्रकारको बाढीपहिरोबाट अरू धेरै जनधनको क्षति पुग्ने सम्भावनाप्रति पनि हाम्रो पार्टीको ध्यान गएको छ । त्यसकारण त्यस प्रकारको क्षतिग्रस्त स्थानहरूमा तुरुन्त उद्धार तथा राहतको व्यवस्था गर्न हामीले सरकार, प्रशासन र सबै तहका स्थानीय निकायहरूसित माग गर्दछौँ । साथै त्यस प्रकारको प्रकोप वा विपत्तिका लागि पूर्व सतर्कता अपनाउन र त्यस प्रकारको व्यवस्था गर्न पनि माग गर्दछौँ ।
गत वर्षहरूमा भूकम्प, बाढीपहिरो वा आगलागीबाट भएको जनधनको क्षतिमा हाम्रो पार्टीले पनि देशका विभिन्न भागहरूमा पीडित जनतालाई राहत वितरण गरेको थियो । हामीलाई यो बताउँदा खुसी लाग्दछ कि त्यति बेला देशभित्र र भारत तथा तेस्रो मुलुकमा रहेका नेपालीहरूले ठुलो मात्रामा सहयोग पुर्याउनु भएको थियो । त्यसरी हामीले गत वर्षहरूहरूमा करिब ८१ लाख बराबरको राहत वितरण गरेका थियौँ । हामीले छिटै त्यसबारे पुस्तिका प्रकाशित गरेर त्यो हिसाबको विवरण सार्वजनिक गर्ने योजना बनाएका छौँ ।
आगामी वर्षा मौसममा बाढी वा पहिरोबाट पुग्ने क्षतिको लागि राहत वितरण गर्नका लागि पनि हामीले देशभित्र, प्रवास वा विदेशमा भएका सबै नेपालीहरूसित सहायता सङ्कलन गरी शीघ्र हाम्रो पार्टीको कार्यालयमा पठाउन अनुरोध गर्दछौँ । वर्षा बढ्नुका साथै त्यसरी जनधनको धेरै नै क्षति पुग्ने सम्भावना छ । त्यसरी देशभित्र वा बाहिरका विभिन्न स्थानहरूबाट आउने सहायताबाट बाढी र पहिरोबाट पीडित जनतालाई केही सहायता पुग्यो भने पनि त्यो खुशीको कुरा हुनेछ । हामीले उक्त रकम सङ्कलनका लागि बेग्लै विपद व्यवस्थापन कोषको निर्माण गरेका छौँ । उक्त कोषमा सिधै र शीघ्र बढीभन्दा बढी सहयोग रकम पठाउन हामीले सबै शुभेच्छुकहरूसित अपिल गर्दछौँ ।”
