हरेक साल नयाँ वर्ष भएर आयो तर जीन्दगीमा कहिल्यै नयाँ बहार आएन ।

0
134

गौरीलाल कार्की

सेकेन्डमा सेकेन्ड नयाँ भयो
पल पलको घाउ सन्चो भएन
एकै मिनेटमा मिनेट नयाँ भयो
पहर पहरको खबर नयाँ भएन
घन्टौं बित्यो घन्टा नि नयाँ भयो
घरीघरीको पिडा कत्ति कम भएन

रातदिन दिन रात बित्यो नयाँ भयो
छाक टार्ने चिन्ता कहिल्यै हटेन
हप्तौं बिति रहे महिना बदलियो
ब्याजले स्याज बढायो सावाँ घटेन
हरेक ऋतुसँगै हरियाली बसन्त आयो
जिन्दगीको पालुवा कहिल्यै पलाएन

हरेक साल दसैं हुँदै तिहार आए गए
ऋण थपियो, परदेशी कहिल्यै घर आएन
हरेक साल यसरी नै नयाँ वर्ष आउँछ
जिन्दगीमा कहिल्यै नयाँ बहार आएन
वर्षौं बित्यो युग युग बित्यो खै के भयो
शासक हो शोषणको अन्त्यमा निखार आएन

सेकेन्ड सेकेन्डको महत्त्व कति छ
मिनेट घन्टाको मुल्य असीमित छ
अपहेलित उत्पीडित मन मस्तिष्कले
पल पल सोच्नु छ नयाँ सिर्जना गर्नुछ
स्वर्ग नर्कको सपना देखाएर लुट्ने विरुद्ध
मुट्ठी उचालेर संघर्षको मोर्चा कस्नु छ

साल समय मात्रै नयाँ आएर हुँदैन रहेछ
समय सँगै संघर्षले नयाँ रित बसाल्नु छ
“कुराले मात्रै बटुको भरिन्न सम्धी ज्यु” भन्थे
काम फत्ते गर्ने आधार निर्माण गर्नु छ
त्यसैले नयाँ बर्ष र नयाँ हर्ष सँगसँगै अब
नयाँ एकता र नयाँ संघर्षको जग हाल्नु छ

LEAVE A REPLY

Please enter your comment!
Please enter your name here